काठमाडौं । नेकपा माओवादी केन्द्रले सरकार पठाउने मन्त्रीको नाम टुंग्याउन नसकेपनि प्रदेश कमिटीमा रिक्त रहेका पदाधिकारी, विभागको प्रमुख र जिल्ला इन्चार्ज भने तोकेको छ।
पार्टी केन्द्रीय कार्यालय पेरिसडाँडामा आइतबार बसेको स्थायी कमिटीको बैठकले विभिन्न प्रदेशमा रिक्त रहेको पदाधिकारी र विभागको प्रमुख तोकेको हो । प्रवक्ता नारायणकाजी श्रेष्ठका अनुसार बैठकले सातमध्ये ६ वटा प्रदेश इन्चार्ज भने तोकेको छ।
जस अनुसार प्रदेश–२ मा गणेश साह, बागमतीमा हितमान शाक्य, गण्डकीमा हितराज पाण्डे, लुम्बिनीमा चक्रपाणि खनाल, कर्णालीमा शक्ति बस्नेत र सुदूरपश्चिममा खगराज अधिकारी चयन गरिएको श्रेष्ठले जानकारी दिए । प्रदेश १ मा भने इन्चार्जको टुंगो लागेको छैन् ।
बैठकले जिल्ला समन्वय समितिका संयोजकहरु तोक्ने काम भने सम्बन्धित प्रदेश समितिलाई नै दिइएको छ । दुई दिन बसेको बैठकले विभिन्न प्रदेशका रिक्त पदाधिकारी, जिल्ला इन्चार्ज र पार्टीका विभाग प्रमुख तोकेको हो ।
बैठकले नेपालको आजको परिवर्तन ल्याउन माओवादी केन्द्रले मुख्य भूमिका खेलेको निष्कर्ष निकालेको छ । प्रतिगमविरोधी संघर्षलाई अघि बढाएर आजको परिवर्तन ल्याउन माओवादी केन्द्रले मुख्य भूमिका खेलेको निष्कर्ष निकालेको हो । बैठकले नेपालका कम्युनिस्ट पार्टीहरूको एकता लागि प्रक्रिया अघि बढाउने निर्णय गरेको छ ।
1613232978.jpg)
